Nei, ég er ekki dauð
Reyndar hefur bara gengið býsna vel hjá mér. Það er búið að járna tryppin og það gekk eins og í lygasögu. Eftir að hafa teymt þau einu sinni utan á hvort ákvað ég að prófa að teyma þau í hendi á snúrumúl. Það hefur gengið alveg glymrandi og eru þau bæði farin að teymast í hendi, báðum megin. Ég er búin að fara einn stuttan reiðtúr á Gleði og gekk það vonum framar. Það var núna á þriðjudaginn og er ég í raun bara að bíða eftir að páskarnir gangi yfir og það verði ekki svona mikið af fólki að ríða út og þá fer ég aftur í reiðtúr. Það gengur líka vel með Dag. Hann er aðeins stífari allur í beisli en hlýðir samt. Eftir tvö þrjú skipti í viðbót í gerðinu er það bara reiðtúr á honum líka.
Það gengur líka vel með hin hrossin. Ég er búin að komast að því að Ára er best með hausinn þegar ég ríð með forláta hálf-stangir sem ég á. Hún er líka best á tölti með þær. Við prófuðum venjulega stangir á föstudaginn og var daman ekki alls kostar sátt við þær. Þannig að við ríðum bara til skiptis með hringamél og hálf-stangir.
Eftir að hafa tekið Ísold í smá prógram í gerðinu þar sem henni kennt að víkja undan fæti og fleiri liðkunaræfingar hafa verið daglegar framfarir á töltinu. Ég var að missa vonina á tímabili og hélt ég væri búin að festa hana í skeiðtölti. En talandi um skeið. Þá ákvað ég að reyna fimmta gírinn á föstudaginn. Skellti drullusokkum (hlífum) á dömuna og síðan í reiðtúr. Svo hleypti ég dömunni á stökk og bað svo um skeið og daman datt niður í skeið. Bara stuttan spotta auðvitað og ekki á fleygiferð en hún hélt taktinum, líka þegar ég hvatti hana áfram. Síðan hægðum við bara niður á þetta fína tölt. Þannig að næstu vikur verður skeiðið æft reglulega.
Gömlu konurnar, Glóey og Gríma, eru aðallega í undirbúningi fyrir fyljun, hehe. Það er að koma þeim í sem ákjósanlegast form upp á frjósemi. Það gengur bara vel. Ég hef líka verið að nota þær til að teyma tryppin. Gríma er náttla algjör draumur í það starf. Glóey er ekki alveg jafn sátt við að hafa dóttur sína danglandi með sér.
Svo eins og þið heyrið, sjáið, er ég bara í fínu formi. Nema ég fari að detta af baki eða einhverja vitleysu, en það er ekki á stefnuskránni.